香港文匯報訊（記者 子棠）不少世界各地的名人親身到巴黎觀賞奧運盛事，繼楊紫瓊與老公、湯告魯斯、Ariana Grande、John Legend一家三口等現場觀賞開幕盛況；香港藝人王丹妮（Louise）和老公羅孝勇（Sheldon）亦有到巴奧現場，更化身運動狂熱分子瞓身支持港隊。
Louise和老公Sheldon一向各有各忙，聚少離多，近日難得有假期，適逢獲手錶品牌邀請飛赴巴黎，展開了旋風式的四天蜜遊奧運之行，首次親身體驗奧運多項賽事。雖然只得短短四天假期，但兩人計劃周詳，這兩天除置身奧運開幕禮中，還一口氣觀看了四場奧運賽事；Louise興奮表示很開心和榮幸能夠親身為港隊打氣：「人生第一次睇奧運真係感覺難忘，昨（前）日開幕禮雖然落大雨，但係都無阻觀眾同運動員嘅熱情 ，落住雨見證各個國家隊坐住船經過塞納河真係好浪漫同好有巴黎特色。睇住唔同嘅歌舞表演，巴黎鐵塔嘅幻燈show，最後仲有我喜歡嘅歌手Ceine
Dion驚喜現身，一路聽一路起晒雞皮，真係超級感動同埋鼓舞。而之後喺現場睇比賽，親身體驗現場熾熱氣氛，觀眾為自己支持嘅隊伍打氣，唱歌跳舞，玩人浪真係好正！」
她還開心表示今次旅程可與另一半一齊參與這個世界體壇盛事，「上年年尾結完婚都好似冇機會咁樣一齊出遊，所以今次對我哋兩個都更有特別意義；我哋兩個睇完開幕禮之後，仲睇埋七人欖球、沙灘排球、游泳、柔道等，行程非常緊湊豐富。Sheldon以前大學時候玩過欖球同柔道，所以佢都睇得特別興奮！我自己以前有打排球，所以亦都好期待睇沙灘排球。但係我哋兩個最期待嘅一定係游泳！能夠喺現場大聲支持港隊，為港隊吶喊助威，興奮心情難以形容，亦都希望港隊可以繼續再創佳績！」
熱愛運動的Louise也回味讀書時期的自己說：「其實由細到大都有參與好多唔同嘅運動，因為個人生得比較高手腳比較長，所以中學入學嘅時候都總會被運動方面嘅團隊招攬，嗰陣時有join划艇，長跑同埋排球隊，仲好記得每個禮拜好幾日放學都不斷咁同其他戰友一齊訓練，現在諗返都係一段好美好嘅回憶。」